Bill Gates og Consumer Electronics Show

Nú um síðustu helgi hélt Bill Gates kynningu á hinni árlegu Consumer Electronic Show (CES) sýningu sem haldin er í Las Vegas. Þar kynnti hann marga sniðuga hluti eins og netþjóna fyrir heimilið, netsjónvarp (IPTV) í gegnum XBOX 360 og auðvitað Windows Vista og Office 2007 sem koma út í lok mánaðarins. Fyrir þá sem hafa áhuga þá er hægt að horfa á kynningu á sérstakri vefsíðu sem Microsoft setti upp í tilefni CES.

Þetta er í 10 sinn sem Bill heldur opnunarkynningu ráðstefnunnar. Hann staðfesti það í upphafi kynningarinnar að hann mun endurtaka leikinn á næsta ári. En það verður hans síðasta opnunarkynning CES, nema eins og hann orðaði það "stjórnendur CES vilji að ræðan snúist um smitsjúkdóma". Þarna er hann auðvitað að vitna í það að árið 2008 mun Bill hætta störfum hjá Microsoft og einblína á góðgerðastofnunina sína.